XORNAL I Santiago .- A presidenta do Parlamento de Galicia, Dolores Villarino, afirmou que “a saúde é indispensable para a preservación da vida e para o desenvolvemento das capacidades humanas e polo tanto, unha necesidade humana básica” e engadiu que “só pode ser garantida mediante a acción pública”. Dolores Villarino foi a encargada de inaugurar esta mañá as Xornadas sobre Financiamento Sanitario que durante todo o día de hoxe se celebrarán na sede da Consellería de Sanidade, e que contan coa presenza dos titulares de Sanidade de Andalucía, Asturias e Cantabria, así como dun director xeral de Cataluña.

No seu discurso, Dolores Villarino asegurou que a conquista social da sanidade pública en España “chegou da man dun goberno progresista, que en 1986 elaborou a Lei Xeral de Sanidade”. Precisamente, para conmemorar este vixésimo aniversario esta mañá inaugurarase un busto en bronce do ex-ministro Ernest Lluch, máximo responsable desta lei que –segundo Villarino- permitiu “consolidar un sistema público, outorgándolle un papel relevante ás Comunidades Autónomas”.

A este respecto, a presidenta do Parlamento de Galicia subliñou que esta lei “dotou ao noso país dun Sistema Nacional de Saúde, coas características fundamentais de universalización da cobertura da asistencia sanitaria e un financiamento basicamente tributario”.

FINANCIAMENTO E DÉFICIT SANITARIOS.- O crecemento explosivo do gasto farmacéutico, a externalización de servizos, a contención do gasto de persoal, así como determinadas deficiencias apreciadas na xestión, son rasgos que caracterizan o funcionamento do Sergas entre 1996 e 2004.

Así o asegurou o catedrático de Facenda da Universidade da Coruña e conselleiro de Contas, Joaquín Álvarez Corbacho, encargado de comezar estas xornadas ofrecendo a primeira conferencia sobre o Modelo Actual de Financiamento. Álvarez Corbacho asegurou que agora precísanse “políticas urxentes tanto desde el lado del ingreso como del gasto”.